Main bhi Himachal
Pradesh se belong karta hun. Himachal main hi mera ek Chota sa gaon
hai jahan aksar main jaata rehata hun. Ye kahani ek bahut hi hairan
kar dene wale pehalu par hai jiski wajah se main andar se hil sa gya.
Is jhatke ki wajah se aur kuch to nahi hua par haan mujhe meri
zimmewari ka ehasaas jaroor ho gya.
Is baar jab main gaon
gya to office ka kuch kaam bhi tha to main laptop sath main le gya.
Mujhe bada gussa aa raha tha ki mujhe laptop utha ke gaon jana padega
kyunki boss ne kam jo de diya tha. Gusse se laptop uthaya aur chal
pada. Sham ke time main gaon pahuncha to nazara dekhne layak tha.
Doobta hua sooraj wo bhi pahadon ke beech main ek alag sa jaadoo
bhikher raha tha. Jaise ki aap is tasveer main dekh sakte hain.
Hum ghar pahunche,
fresh huye aur halka fulka nashta kiya. Raat ko sabhi sath main
baithe aur gapen maari garmiyon ke din the to sabne angan main hi
khatiya laga li sone ke liye mujeh to pata hi nahi chala ki gaon ke
aangan main thandi hawa main baaten karte karte kab neend aa gyi.
Subha jab utha to ek dum fresh fresh lag rha tha. Pakshiyon ka cheh
chhaana, janwaron ke gale main bandhe gantiyon ki awaz kaano main
maano ras ghol rahi ho.
Subha uth ke khana
wagera kha ke main apne kuch rishtedaaron ke ghar chala gya. Unse
mila baaten ki aur sabse mila. Bahut dino baad gya tha to sab bahut
ache se swagat kar rahe the. Aise hi karte karte shaam ho gyi. Mere
gaon ki sham dekhne layak hoti hai. Maine aangan main chair lagayi
aur baith kar apna kaam karne lag gya. Kyunki main IT field main hun
to mera sara kaam computer pe hi hota hai. Maine gusse main apna sada
sa laptop nikala aur uspe kaam karna shuru kar diya (us time bhai
sada sa hi lag raha tha).
Thodi der baad gaon ke
kuch bache mere ghar main aa gye. Wo apni masti main khelte koodate
aaye aur bilkul apne aap main mast the. Unko dekh ke lag raha tha
mano zindagi ka asli maza to ye hi le rahe hai. Mujhe apna bachpan
yaad aa gya unhe dekh ke. Khair, wo meri taraf hi aa rahe the. Wo
mere paas pahunche aur mujhse mile, mujhe namaste kaha aur mere paas
baith gye. Wo jyada chote bhi nahi the shayad ek 6th main hoga aur ek
4th main. Unke saath ek chota sa bacha aur bhi tha jo shayad abhi
school nahi jata tha. Wo sab bahut pyaare lag rahe the.
Maine thodi der unse
mila aur fir kaam shuru kar diya. Wo apas main hi khusar fusar kar
rahe the kuch, maine jyada dhyaan nahi diya. Achanak mere kaano main
unki ek baat padi jise sun ke main hairaan ho gya. Unme se ek ne kaha
“bhaiya ke paas kitna chota TV”... maine use hairani se dekha aur
maine kaha “nahi beta ye TV nahi hai”. Us bache ne badi masumiyat
se pucha ki “bhaiya fir ye kya hai? Lag to TV hi raha hai”. Maine
use fir se hairani se pucha “beta tujhe sachi main nahi pata ye kya
hai?”. Usne na main sar hila diya. Aur bas fir kya tha mere sawal
shuru ho gye.
Main: “beta tum log
school jaate ho” ??
bacha: “haanji
bhaiya”.
Main: “tumhara school
private hai ki sarkaari hai”?
Bacha: “ji Sarkaari
hai”.
Main: “tumhare school
main computer nahi hai ?? koi sekhaata hai apko computer? ”
Bacha: “ek do hai ji
par wo kharab hai aur kabhi chalaya bhi nahi humne bas kitabon main
dekha hai humne”.
Bas uske itna kehane ki
der thi aur main saari baat samjh chuka tha. Main un bacho ki taraf
dekh raha tha aur main unme unka future dekhne ki koshish kar raha
tha par afsos mujhe kuch dikhayi nahi de raha tha.
Khair maine ye saari
baate baad main sochne ka faisla kiya aur us time maine un bachon ko
kahan aao main batata hun ye kya hai. Fir maine unhe bataya ki ye TV
nahi ise Laptop kehate hai jo ki asal main computer hi hai. Ismain
hum apna koi bhi kaam asani se kar sakte hai. Fir maine unhe Msword
main unka naam likhna sikhaya. Unko web cam main hi unki photo
dikhai. Unko laptop main games khilayin, gaane sunaye aur kuch videos
deikhayi kuch dharmik aur kuch filmi. Main jab bhi unko kuch dikhata
wo hairan hote rehate, jitna aur dikhata utne hairan hote jaate,
kehate ki bhaiyaa itne se laptop main itni cheezen kaise aa gyi
hongi. Banta to ye tha ki main unke sawal pe hairan ho jaun Par Ab
meri hairani kam ho chuki thi aur wo dheere dheere zimmewari main
tabdeel ho gyi thi. Fir mere man main aya ki main unhe kuch aur
sikhaun kuch aur, thoda aur...
jab unhone laptop dekha
to unke dimaag main ek baat zaroor aayi ki abhi hume bahut kuch
dekhna hai aur seekhna hai. Maine unhe kaha ki school main jaa ke
teachers ko kaho ki hume computer sikhaye. Wo maan gye aur kaha ki
hum zaror bolenge. Wo sabhi khushi khushi wahan se chale gye aur
kehate gye ki hum ghar jaa ke sabko batayenge ki aaj humne laptop
chalaya.
Meri aankhen thodi nam
thi aur dil main thoda sukun ki mera yahan laptop le ke aana bekaar
nahi gya. Ab maine socha ki ye to do bache the jo mujhe mile aur aise
to aur bade honge jo abhi in cheezon se door honge. Kaafi time isi
soch main dooba raha aur maine faisla liya ki ab main kuch karunga in
bachon ke liye aur kuch karna muje meri zimmewari lagne lag gya. Inhe
har us cheez ki knowledge aur awareness dunga jo shehar ke bachon ko
hai par yahan gaon main nahi.
Main MNC main job karta
hun jahan Saturday aur sunday dono off hote hai. To main saturday
morning main apna saman le ke nikal jata hun himachal jahan mera kuch
private schools ke sath tie up hua hai ki main wahan jaa ke bachon ko
latest technologies aur general awareness ke programs deta hun. Aur
wo mera idea hit gya. Aaj main teen schools se juda hua hun aur un do
bachon ki hi tarah jo aur bache hai unko wo sab sikhata hun jo unko
pata hona chahiye.
Appeal: Aap bhi apne aas
paas dekho aur agar apko kuch bhi aisa milta hai jahan aapko lage ki
aapke thode se efforts se aap kuch sudhar sako ya kuch aur addon kar
sako bachon main to zaroor karen. Issi se humare samaj, pradesh aur
desh ki tarraki ho sakti hai. Ye humari zimmewari hai aur hume apni
zimmewari samjh kar ye karna hai. Umeed hai aap zaroor karenge.
Karoge na???