Barsaat ka mausam aur wo bhi pahadon main isse acha nazara aur mantaramugdh kar dene wali feeling aur kahin nahi ho sakti. Mujhe ye ehasaas bahut hi jyada pasand hai aur main mauka dhoodta hun ki kab mujhe ye mauka mile aur main pahadon mein barsaat ke time pe jaa sakun. Waise bata dun mera gaon bhi Himachal Pradesh main hi hai... ek baar aisa mauka aa hi gya. 

Mere father sahab ko gaon main kuch zaroori kaam aa gya aur unhone mujhse pucha “tujhe chhutti kab ki hai? Hume jana padeg gaon kaam ke liye.” maine kaha “papa ji Shanivaar ko chalen to chalega?” papa ne kaha ki theek hai final hai fir. Aur main mann hi mann bahut khush ho raha tha ke barsaat ke mausam mein gaon jayenge.... wooowwwwwwwww.... Saturday aane mein do teen din hi the par ab mujhse intezaar nahi ho raha tha. 

Akhirkaar wo din aa hi gya. Main us subha jaldi uth gya aur apni tyaari karne laga. Maine aur papa ne hi jana tha to papa bhi jaldi hi tyaar ho chuke the. Humne nashta wagera kiya aur fir nikal liye apne gaon ke liye. Bahut pyaara rasta aur takreeban 3 ghante ki drive thi. Rukiye rukiye abhi hum pahunche nahi hain... apko main wo rasta dikhata hun jo national highway se link ho ke humare gaon ko jata hai aur wahan ka nazaara dikhata hun .... hum jaise hi gaon pahunche badal chaye huye the aur halki halki boonda baandi shuru ho gyi thi. Maine raste mein hi apni car roki aur lag gya photoshoot karne. Unme se kuch pics main aapke saath zaroor share karna chahunga. Lijiye dekhiye....

Aap dekh sakte hai ki meri car par baarish ki boonde padi hui hain. Barsaat ke mausam main aksar Himachal ke pahadon mein hariyaali chha jaati hai. Aap dekh sakte hai aas paas ka jungle kitna hara bhara hai ... to ye nazara bahut hi mann moh lene wala tha. Khair thodi si photos kheenchne ke baad hum aage chal pade jahan hume kaam tha. Papa ko jahan kaam tha papa wo karne chale gye aur main fir se kudrat ke kuch nazare capture karne lag gya. Boonda baandi abhi bhi ho rahi thi. Main apne gaon ki har ek location aur jagah se bahut ache se vakif hun to mujhe pata tha ki yahi paas main ek choti si nadi bhi behti hai bilkul choti si lekin bahut pyaari. Maine waha chala gya aur uska nazara main shabdon main to byaan nahi kar sakta aap khud hi dekh lijiye..

Ye paani mein gir rahi boonde aur jungle mein se aati hui nadi ek pyaara sa sama baandh rahi thi .. 

Ab thode se baadal chhte aur main aise hi ghumne firne lag gya aur papa ki wait karne laga. Papa ko time lagna tha. Main ghoom raha hi tha ki achanak meri nazar ek school jaisi kuch jagah par padi. Matlab ek choti si imaarat jispe kuch achhe vichaar likhe huye jaise ki school pe likhe hote hai. Main waha chala gya aur waha jab pahuncha to dekha ki bahut chhote chhote bache wahan hai jo ki padhne aaye hai. Wo ek AANGANWADI point tha. Chhote chhote bache jo abhi schools mein dakhila nahi le sakte wo aanganwadi mein jaate hai. Unke mata pita unhe wahan bhejte hai taaki wo school jaane ke liye tyaar ho jayen. 

Ab bache to mujhe bahut pasand hai to main unke paas chala gya. Pehale to wo mujhse kuch dare aur mujhe dekh ke bhaag gye. Unki dekhbhaal karne ke liye jo aunty wahan the unhone un bachon se kaha ki daro mat ye kuch nahi kahenge. Ab main sochne laga ki unse dosti kaise ki jaye. Thodi der sochne ke baad mere dimaag mein ek tarkeeb aayi. Maine apna camera nikala aur un bachon ke paas chala gya aur maine unhe kaha ki chalo saare khade ho jao main aapki photo kheenchunga. To bachon main jaise khushi ek dum bhar si gyi. Unko photo khichwane ka pata tha sirf par ye nahi pata tha ki photo khichwane ke liye ache se tyaar bhi hona hai. Wo jaise the waise hi aa gye. Main unki ye sachai ye masumiyat aur ye bachpan ka sunehara wakt apne camera mein kaid karna chahta tha. Unka wo khelna, hasna, masti karna, wo masumiyat aur wo Purity main miss nahi karna chata tha. To maine kuch tasweeren khinchi unki jinme se kuch main apke sath share kar raha hun dekhiye....

Unki photo kheench ke maine unhi ko dikhani chahi to wo badi jaldi mere paas aa gye. Fir main thodi der unke saath khela, unhe hasaya aur bahut saari masti ki. Fir maine socha ki kyun na main uske saath bhi photo khichwaun. To maine un sab ko apne peeche khada karwaya aur saath main khade rehane ko bola. Wo mere saath khade huye aur wo mere paas jaise hi khade huye unhone apne chhote chhote haath mere kandhon pe rakh diye. Unka mere kandhon pe haath rakhna matlab mere upar unka bharosa aur mere saath unki dosti tha. Mera mann jaise khil utha aur maine unke haathon pe apna haath rakhke bharose ko aur mazboot kiya. Fir maine kuch photos li jinmain se kuch main aapke sath share kar raha hun. 

Aanganwadi ke bachon ke saath milke maano main apne bachpan main chala gya tha. Unke saath reh ke apne aap ko unki tarah hi mehasoos karne lag gya ki main bhi chhota sa bacha hun. Itni pyaari feeling thi wo ki main shabdon main byaan nahi kar sakta. Khair...

Uske baad papa aa gye. Unhone mujhe chalne ko kaha aur mujhe na chahte huye bhi un bachon ke paas se jana pada. Kuch time aur unke saath bitana chahta tha. Par koi baat nahi. Fir hum wapis gaon se apne ghar ki taraf chale. Raaste main kuch aur nazare capture kiye. 

Achhe hain na. Ye mera din jaisa main chah raha tha waisa hi raha. Ek dum alag aur achha. Aur mujhe ek cheez apne is aaj main bahut achhi lagi. Aur wo thi Aanganwadi. Mujhe ye jaan ke bahut khushi ho rahi thi ki humara desh aaj bhi aanganwadi jaisi sansthaon ko utni hi mahatavta deta hai jitni ki humare time mein thi. Aur main bhagwaan se dua karta hun ki ye rahe, Kyunki bade ho kar aaj hum bahar nikal aaye hai par bachpan ki haseen yaadon mein aaj bhi ye aanganwadi ki kuch haseen yaaden hai jinhe yaad karke sukoon milta hai aur kuch aansoo un yaadon ko aur zyada mazboot kar dete hai. Mujhe lagta hai ye kuch yaaden aisi yaaden hain jo aaj kal ki bhaag daud bhari zindagi mein kuch sukoon ke lamhe hume de sakti hain... ye jitni mazboot hongi utna sukoon milta jayega... bohat sukoon.....         

                             

Shehar ki duniya... jahan sab kuch advanced hai aur automated,  aur sabse badi baat ki saari sukh suvidhayen mili hui hai. Insaan ko hilne bhi nahi dete aur sara kaam ho jata hai. Hahahah bahut hi alag duniya hai. Par is duniya se hume fayda bhi hai aur nuksaan bhi. Fayada hai ki naye zamane se kadam se kadam mila ke chal rahe hai aur nuksaan ye hai ki aane wali peedhi aur jyada sust aur nazuk banti jaa rahi hai. Unhe ehasaas hi nahi ki shaaririk mehanat kya hoti hai. Sab kuch mil jata hai bina mehanat kiye. Yahan tak ki aaj kal aap malls main chale jao wahan to apko chalne bhi nahi dete. Apko seedhiyan chadhne ki zaroorat nahi bas khade ho jao wo khud aapko upar le jayegi waah. Bade hoke aaj ke bachon ka kya hoga bhagwaan jaane. Agar aadarniya (respected) mata pita ye kahani padh rahe hai to kripya apne bachon ko thoda shaaririk prishram bhi karwayen taaki kal ko wo jaldi budhe na ho jayen. Chalo ab main kahani pe aata hun. 

Kyunki main sukh suvidhaon ki baat kar raha tha to hum shehar main rehate hai aur kya dekhte hai ki har ghar main ek nahi balki 10-10 nal (water taps) hai. Har ek se paani nikalta hai. Kisi se garam aur kisi se thanda. Aapko kahin nahi jana padta paani lene ke liye. Acha hai aur hona bhi chahiye. Par main personaly ek cheez ko bahut yaad karta hun aur dil se use chahta hun, wo hai mere gaon ka “KUAAN” (Well). Wo kuaan jahan se kudarati paani nikalta hai aur sara gaon us kuyen pe ikatha ho ke paani bharta hai aur apni sari dincharya niptata hai. Mujhe kuyen se personaly bahut pyaar hai. Us kuyen se juda ek kissa aapko main sunata hun aur dikhata bhi hun wo kuaan... 

Ek baar mere gaon main mere chachere bhai ki shadi thi. 

Humara parivar shehar se shadi ke liye gaon aa gya. Pahunchte hi gaon ke sab log aur rishtedaar humse milne ke liye aage badhe aur hum sabse mile. Main aur mera bhai bache the to sab badon ke pair chuye aur ashirwaad aur pyaar liya. Sabne humara swagat bahut ache se kiya. Abhi shadi main do teen din baaki the aur mujhe gaon ki shadi mai sabse jyada maza shadi ki tyaariyan karne main aata hai. Main jaate hi bags rakh ke aur change karke shuru ho gya. Samaan ikatha karna, ek jagah pe sambhal ke rakhna, dulhe ke kapde uska sara saman sambhalna.  woowwwww.... sab kuch bahut acha chal raha tha aur mujhe bahut maza aa raha tha. Aur main shadi ke mahaol main mano beh sa gya tha. 

Do din humne puri tyaari kari sab bhaiyon ne mil kar. Maine shayad ek dedh din se to mamy papa ko dekha bhi nahi tha ki wo kahan hai aur kya kar rahe hain hahaha... khair unhe bhi pata tha ki main kaam main busy hun. To ab jo tha shadi main hone wali tyaariyon ka sabse acha hissa shuru hone wala tha. Jiska main besabri se intezaar kar raha tha. Aur wo tha shadi ke liye paani bharna tanks main. Gaon ka mahol tha aur un dino do teen gharon ke liye bas ek hi nal hota tha jahan se paani bhara jata tha. Par shadi ke liye paani bahut lagne wala tha aur itna paani nal se bahut time main bhara jaata. To mujhe pata tha ki ab to ek hi jagah bachi hai jahan se paani ayega aur wo hai humare gaon ka KUAAN...        

            

      

Main bahut khush tha kyunki sab kuyne se paani bharne ki tyaari kar rahe the. Maine dekha kisi ne ghada uthaya hua hai kisi ne baalti paani bharne ke liye. Ek do ne rassiyan uthayi ui thi kuyen se paani nikalne ke liye. Ek ghada maine bhi utha liya aur chal pede hum log paani bharnae ke liye. Thodi door humne chal ke jana tha aur wo bhi pahadon ke beech main se. Saare bhai ek saath ikathe jaa rahe the. Koi mazak kar raha tha aur koi chidh raha tha aur koi maze le raha tha... bahut khushnuma mahol tha. Main bahut enjoy kar raha tha. Hum bas kuyen ke paas pahunchne hi wale the. Ek choti si pahadi utarne ke baad hum kuyen tak pahunch gye. Aur wahan pahunch ke main bas wahan baith ke us lamhe ko jeene laga. Sab kuch bhul gya kaun hun kahan se hun aur kya hun. Sab bahut masti ke mood main the. 

Humne paani bhara aur thodi masti karne ke baad hum sab ne apna apna ghada aur baalti uthayi aur ghar le gye .. Us din humne lagbhag 2 ya 3 chakkar lagaye kuyen ke aur paani ka kota pura ho gya. Bas ab kya tha agla din tha shadi ka aur bas sab log apni sajawat main lag gye ki kal shadi hai aur ache dikhna hai. 

Maine is shadi ko bahut enjoy kiya aur kabhi bhul nahi paya kyunki shayad ab main itna bada ho gya tha ki jazbaaton ko samjhna shuru kar diya tha. Apni dharti se aur kuyen jaisi apni aur cheezon ki ehamiyat samjhne lag gya tha. Mujhe aaj bhi wo shadi bahut yaad aati hai aur jab bhi gaon jata hun to us kuyen pe zaroor jata hun jahan se aaj bhi log paani peete hai.                

        

Ek baar Mujhe apne dost ke gaon main jaane kaa mauka mila. Uska ghar Himachal Pradesh main hai. Office main bhi chutti thi to socha is baar kuch change kar liya jaye. Mujhe pahad aur wadiyan bahut achi lagti hai to socha is baar kahin pahandon main jaya jaye aur kudarti mere dost ne ghar jana tha to humara program ban gya. 

Hairani ki baat ki kudarat ki god main pahadon ke beech bas 5-7 gharon ka ek gaon aur wo bhi thodi thodi doori par hi. Wahan har ghar main sabne apni zaroorat ke hisab se gaye(cow), Bhains (buffalo) aur bakriyan (Goats) rakhe huye the. Humara subah se sham tak ka ghumane firne ka kam hi rehata. Alag alag tarah ke ped paudhe, unche neeche pahad, choti choti pagdandiyan, chote chote nadiyan naale aur bada kuch. Apne ap ko kudarat ke itne paas rakh ke bahut sukun mil raha tha. Na gadiyon ki awan na pu pu painnn painnnn... Bas panchiyon ka chehchaana aur hawa ki awazz. 

Jab sham hui to maine socha saman sametna shuru kar dun kyunki agle din wapis shehar jana tha. Saman wagera lapet ke thodi si tazi hawa khane bahar nikla to jahan janwar bandhe the wahan dekha ki ek chota sa bakri ka bacha khel raha hai.bahut pyaara lag raha tha. tabhi maine achanak se dekha ki wo ek baithi hui bhains(buffalo) ki peeth pe jaa chadha. Main dar gya socha ki yaa to ye bhains use maar degi ya agar uth gyi to wo neeche gir jayega. Maine bhag ke apne dost ko bulaya aur kaha ki use hataye. Mera dost mujhpe hasa aur kehane laga "bhai inka apas main bahut pyaar hai, bhains nahi uthegi ye bakri ke bache ko pata hai isliye upar chadh gya. Aur bhains ko pata hai ki wo bacha hai jo roz uske saath khelta hai aur wo bhi use janti hai aur pyaar karti hai. To tu ghabra mat aur chal chai peete hain."

Mujhse raha nahi gya aur maine is scene ki photo kheench li jo ki apke samne hai. 

Maine jo samjha ki is duniya main pyaar banta hai kuch cheezon se jinhe kehte hai....

BHAROSA: Jo is bakri ke bache ko hai bhains pe ki wo nahi uthegi.

UNDERSTANDING: Jo bains main hai ki koi ni bacha hai ye apna. 

In dono ko mila ke banta hai PYAAR (LOVE) jo aaj kal insaano main kam hota jaa raha hai. 

Bhagwan ki banayi is kayanaat main sab pyaar ke hakdaar hai aur sab pyaar karne layak. Aao inse kuch seekhen .......